ईपरी न्यूज बरेङ ।
सौरमास अनुसार पहिलो साउने सोमबारको व्रत आजबाट सुरु भएको छ ।
साउन ७ गते सोमबार सौर र चान्द्रमास दुवैअनुसार पहिलो सोमबार परेको छ । गुरु पूर्णिमादेखि जनै पूर्णिमासम्मका सोमबार व्रत लिनुपर्ने कुरा निर्णय सिन्धुलगायत ग्रन्थमा उल्लेख गरिएको विज्ञहरु बताउँछन् ।
साउन महिना भगवान् शिवको महिना र सोमबार भगवान् शिवजीको बार भएकाले व्रत बस्ने परम्परा छ । यस दिन विशेषरुपमा आशुतोष भगवान् शिवको पूजा, आराधना गरिन्छ ।
नेपालमा सौरमास अनुसारका सोमबार नै व्रत गर्ने परम्परा रहेको छ । साउनको सोमबार शिव मन्दिरहरुमा विभिन्न संस्थाले शिवालय मन्दिरहरुमा स्वास्थ्य शिविर, निःशुल्क भोजन कक्ष पनि सञ्चालन गर्न लागेका छन् ।
साउन महिनामा शिव मन्दिरहरुमा सुन्दरीजलबाट बोल बम यात्रा गरी जल चढाउने भक्तजनको पनि भीड लाग्ने गर्छ । साउन महिनाको सोमबारका दिनमा देशभरका शिवालयमा आशुतोष भगवान शिवको पूजा, आराधना गर्न भक्तजनको भीड लाग्ने गर्छ ।
साउनको पहिलो सोमबारदेखि अन्तिम सोमबारसम्म व्रत गरेका भक्तजनले अन्तिम दिनमा गोदान एवं पूर्णपात्रदान गरी व्रत समापन गर्ने विधि छ ।
